قصيدة للشاعر / معيض الخثعمي بعنوان صفات الاصدقاء

قصيدة شعرية بعنوان صفات الاصدقاء للشاعر القديرالاستاذ
معيض بن ظافر الخثعمي ابو عمر

يقول ابن ظافر على نظم الابيات
نظمت علمي وانتظم في نظامه
البيت بعد البيت يبني مقالات
حتى الهدف يمضي وهو في تمامه
اقولها يوم ان في الوقت ميلات
واللي يطيعه غيّره من مقامه
ترى الحياة دروس في كل الأوقات
ومن فهمها بشّره بالسلامة
والجاهل اللي ما يعرف العقوبات
لا والله الا بشّره بالندامة
مع كثير الناس عندي علاقات
من الحجاز ومن قبائل تهامة
وانا معي في كل واحد علامات
من واقع افعاله تبين العلامة
فيهم صديق في جميع المجالات
ويضمن علاقات الشرف والكرامة
هو عزوتي عند العلوم المهمات
يشهد على افعاله بكثر اهتمامه
يوقف بصفي في الظروف القويّات
مثل الجمل مستعرض في سنامه
ويسّهل الدعوى ولو هي صعيبات
مجار ما تلحق عليه الملامة
ينصح ولا يجرح رفيق بزلاّت
واللي بقلبه واضح في كلامه
دائم علومه في قدومه مسرات
والطيب للطيّب يزيد احترامه
فهاذي صفات اهل الشيم والمروات
واهل العلوم الوافية والشهامة
وفيهم صديق ينفعك لاجل حاجات
وهذي اهدافه وغاية مرامه
فان كان ما تحسب لجيبك حسابات
حطك من اصحاب الكرم والزعامة
وان كان شافك في ظروف عسيرات
ذمك وقفّا ناوين بانهزامه

فهذا صديق القرش بو عشر نيات
لا يخدعك من ضحكة وابتسامة
وفيهم طويل لسان راعي وجاهات
صوته يصحي نايم من منامه
لاعاد في المجلس يسوي بطولات
تقول ابو زيد الهلالي سلامه
لكن لا جيته تدّور لفزعات
كثّر معاذيره وماتت عظامه
ما دام تحتاجه فهو في مغيبات
وان قابلك في الدرب سوى اللثامة
وفيه من يسعى بنقل النمامات
مشغول في الدنيا بنقل النمامه
بريد مستعجل لنشر الدعايات
نشر الدعاية راحته وانسجامه
يبني على ما يسمعه عشر كذبات
وكل علم يحط فيه انقسامه
يفرح اذا جاء عند غيره معيبات
وذّه يجي في كل جدر انهدامه
من شان يتهرّج ويكسب حكايات
ولا درى ان الوقت فيه ابترامه
ويعيّب الطيب اذا كان مفتات
ويجامله بالمدح لاعاد امامه
فاذا حصل من يطلوب حقوق واثبات
اصبح كلامه ما عليه التزامه
ويسير عنده رجفة واهتزازات
وتظل عينه مثل عين الحمامه
ولقيت ناقص عقل فيه ارتجاجات
نفرح ونتباشر نهار انعدامه
ترمي لسانه في المجالس بغلطات
يخطي ولا يدري وهو من غشامه
قول يقوله ما يجيله نهايات
متساويا في مبتداه او ختامه
محدوده افكاره ولا له قرارات
على كلام الناس يربط حزامه
وراه ناس ترسله بالفلالات
ولا يسير الاّ وهو في خطامه
فهذاك ما يحسفك مثله اذا مات
ما يحسف الا يوم يلبس عمامه
وهذي صفات اهل النفوس الدنيات
ما حق الا يلبسون البسامة
وكل مخلوق بيزرع زراعات
يلقى نتائج ما زرع في صرامه
واصابعك في الكف ما هي سويات
حتى الطيور اشكال صقر وهامه
تمت وصلوا عدّ قطر السماوات
على شفيع الخلق يوم القيامه

وسلامتكم جميعا
أبــــو بــــدر القادمي ,,,,,,,,,,,,,,

» قصيدة الشاعر /سعيد السراد في شاعر المليون
» قصيدة السينيه للشاعر/ موسى بن عبدالله الخثعمي
» قصيدة عن الارهاب للشاعر / سعيد السراد
» مقابلة مع الشاعر الاستاذ / معيض الخثعمـى
» قصيدة وحل ؟؟ للأذكياااء